Vetëm zhvillimi ekonomik mund t’i bashkojë shqiptarët

Sipas organizatorëve, qëllimi i këtij panairi është informimi i qytetarëve të Luginës së Preshevës, por edhe të rajonit për prodhimet dhe shërbimet kombëtare të cilat meritojnë një trajtim më të mirë.

Në këtë panair të pranishëm ishin përfaqësues të AKB-së, kryetarët e komunave të Preshevës dhe Bujanocit, përfaqësues të bizneseve të Maqedonisë dhe Shqipërisë, ndërsa u vlerësua se përmes këtij panairi tentohet të ndërtohen kanale të reja të komunikimit mes prodhuesve kombëtarë, vendimmarrësve dhe konsumatorëve.

Agim Shahini, kryetar i Aleancës Kosovare të Bizneseve, ka thënë se “Javët e Biznesit Kombëtar”, po realizohen në kuadër të 100 vjetorit të shtetit shqiptar.

Ai ka thënë se me sukses po përmbyllin projektin “Javët e Biznesit kombëtar në Kosovë”, i cili ka nisur që nga 17 shkurti dhe po vazhdon rrugëtimin në të gjitha trevat shqiptare në pesë shtete, Kosovë, Shqipëri, Maqedoni, Mal të Zi dhe Luginë të Preshevës, transmeton “Kosovapress”.

Ndërsa, Nagip Arifi, kryetar i Komunës së Bujanovcit ka thënë se realizimi i projektit, “Javët e Biznesit Kombëtar” ka rëndësi të madhe dhe promovimi i prodhimeve kombëtare, pasi që për herë të parë po realizohet në Luginën e Preshevës, duke porositur kështu gjithë shqiptarët që të konsumojnë produkte kombëtare.

Kryetar i Komunës së Preshevës, Ragmi Mustafa, ka thënë se projekti “Javët e Biznesit Kombëtar” nisi me 17 shkurt ditën e shpalljes së pavarësisë së Kosovës, duke vazhduar në gjitha viset edhe këtu me bashkimin e prodhuesve shqiptar.

Ky panair, po mbahet në kuadër të shënimit të njëqindvjetorit të shpalljes së Pavarësisë së Shqipërisë, që ka filluar më 17 shkurt, e që do të përfundojë më 28 nëntor, ku të gjithë prodhuesit nga mbarë trojet shqiptare do të bashkohen në Vlorë. /Telegrafi/