Vetëvendosje alarmon për gjendjen ekonomike e sociale
Lëvizja Vetëvendosje, të enjten duke shpërndarë posterë në Malishevë, ka alarmuar se gjendja ekonomike dhe sociale dita ditës vetëm po përkeqësohet. Në këta posterë Vetëvendosje ka paraqitur pesë shkaqet kryesore të kësaj gjendjeje sipas tyre, e ka sjellë korrupsioni papunësia kushtet e vështira ekonomike dhe rritja e taksave. Pasurimi i shpejtë i zyrtarëve komunalë, që është në shpërputhje me pagat e tyre, tregon për nivelin e lartë të korrupsionit. Cilësia e dobët e punimeve në shumë projekte publike, si dhe tkurrja e hapësirës publike, janë rezultat i këtij korrupsioni.
“Fakti që rreth 300 persona të kualifikuar kanë aplikuar për 10 vende të punës në Qendrën e Kompetencës, tregon për nivelin e lartë të papunësisë. Kjo gjendje e rëndë sociale vjen si mungesë e zhvillimit ekonomik dhe politikave lokale të punësimit”, thuhet në njoftimin e Vetëvendosjes, ku bëhet e ditur po asht se si rezultat i gjendjes së rëndë ekonomike rreth 900 familje jetojnë me asistencë sociale në ketë qytezë.
Po ashtu kjo lëvizje ka kritikuar udhëheqjen komunale për taksat e larta. “Në vend që të mendohet për rritjen e numrit të bizneseve të vogla dhe të mesme duke i stimuluar investime, Komuna ka rritur taksat duke i ngarkuar tej mase bizneset, në kohën kur ato vazhdimisht ankohen për rënie të fitimeve.
Krahas rritjes së krizës, në Malishevë çdo ditë po rritet edhe pasuria e Kryetarit. Edhe vila e ndërtuar së fundmi në fshatin e Isni Kilajt, i bashkohet zinxhirit të shtëpive luksoze të tij”. /Telegrafi/
