Vitin tjetër vendim i ri për qeset e plastikës
Ministri i Mjedisit dhe Planifikimit Hapësinor, Dardan Gashi priti drejtorin ekzekutiv të Odës Ekonomike Amerikane në Kosovë (OEAK), Arian Zeka dhe menaxherin e kompanisë Viva Fresh, Ylber Kuraja. Në këtë takim, përfaqësuesit e OEAK-së shprehën gatishmërinë e tyre për përkrahjen e një udhëzimi ligjor nga Ministria e Mjedisit, përmes të cilit pagesa e qeseve të plastikës do të bëhej e detyrueshme për të gjitha bizneset."Ky shqetësim i Odës Ekonomike Amerikane vjen për arsye se vendimi për vendosjen e akcizës nga ana e Ministrisë së Financave nuk e bën kategorizimin e qeseve të cilat hyjnë në Kosovë dhe nuk parasheh akcizë për lëndën e parë për prodhimin e qeseve në vend. Sipas tyre, kjo “paqartësi” ligjore ka hapur dyert për rrugë alternative të pajisjes së bizneseve të vogla me qese të plastikës, duke mos i faturuar ato", thuhet në njoftimin për media të kësaj ministrie.
Ministri Dardan Gashi siguroi se kjo masë e marrë nga Ministria e Financave është e përkohshme dhe do të rishqyrtohet në Janar të vitit 2013. Sipas tij, Ministria e Mjedisit dhe Planifikimit Hapësinor duke u bazuar në parimin e mbrojtjes së mjedisit ka përkrahur vendimin për akcizën në produktet që njihen si ndotës mjedisorë, siç janë qeset e plastikës, poqet elektrike joefiçente dhe gomat e përdorura të makinave.
Megjithatë, nënvizoi se kjo çështje do të riadresohet në janar të 2013, ku paraprakisht do të ftohen edhe grupet e interesit para nxjerrjes së një vendimi të ri. /Telegrafi/
