VV: Nuk ka ndryshim vendimi, është arritje qëllimi

“E ky qëllim ishte që kompania greke Titan të fitojë miliona Euro dhe që në të njëjtën kohë të merr pozitë dominuese në treg karshi prodhuesve tjerë, shumica nga Shqipëria. Për ta mbajtur këtë vendim në fuqi, Qeveria e Kosovës organizoi bojkotimine Kuvendit kur e pa se me vota do të humbiste, përjashtoi nga koalicioni Emin Gërbeshin për shkak se parashtroi pyetje dhe ofroi mbrojtje në treg për çimento të shtrenjtuar, plot 51 ditë të periudhës verore, kur çimentoja është në kërkesë të lartë”, thotë Vetëvendosje.

Pasi që arsyetimi i ministrisë dhe qeverisë ishte se me këtë po mbrohen vende të punës, Lëvizja Vetëvendosje, ka kërkuar nga ministria dhe qeveria që të tregojë se sa vende të punës janë krijuar apo janë mbrojtur këto pesëdhjetë e një ditë, cila është përqindja e tregut që Titani e ka fituar dhe do ta mbajë tash e tutje, si dhe sa është fitimi i kompanisë Titan nga këto masa të mbrojtjes.

“Tanimë është e qartë se qëllimi i mbrojtjes nuk është zhvillimi ekonomik apo mbrojtja e ekonomisë kosovare, sepse po të ishte kjo arsyeja atëherë qeveria e Kosovës së pari do mbronte tregun nga produktet serbe dhe shumë produkte të tjera, të cilat e vërshojnë Kosovën duke shkaktuar humbje shumë-milionëshe dhe humbje të qindra vendeve të punës. Ka shumë prodhues më vendorë se Titani apo jo?”.

Sipas Vetëvendosjes, ka sektorë e industri që punësojnë e mund të punësojnë më shumë se Titani. Reduktimi i prodhuesit dhe punësuesit vendor vetëm në këtë kompani greke është ofendim për të gjithë punëtorët, bujqit, qytetarët e shtetit tonë. /Telegrafi/