VV: Po importojmë thuajse çdo gjë që konsumojmë
Lëvizja Vetëvendosje vlerësoi të premten se viti 2012 po përmbyllet me disbalanc edhe më të madh tregtar se ai i vitit 2011. Vetëvendosje theksoi se atë që e kanë thënë se nuk mund të ketë zhvillim pa prodhim tash më sa e sa vite po dëshmohet.
“ Ne importojmë thuajse çdo gjë që konsumojmë, dhe duket se ky edhe është qëllimi i vetëm i këtyre qeverive. Vitin 2012 e përfundojmë me buxhet i cili mbushet në lartësi prej gati 80% në dogana, e që nënkupton varshmëri totale nga të hyrat doganore. Vitin 2012 e përfundojmë me tkurrje të sektorit privat”, u tha në konferencën për media.
Po ashtu u theksua se vitin 2012 ka pasur edhe tkurrje te investimeve te huaja direkte.
“Vitin 2012 e përfundojmë me papunësi 45% e që ka tendencë rritjeje krahasuar me 2011. Asgjë e vetme nuk është bërë nga kjo qeveri për ta ulur papunësinë. Vitin 2012 e përfundojmë me investime kapitale, në asfalt, dhe atë me një kontratë që ende nuk është publike, shpenzim të parave të qytetarëve dhe qytetarët nuk e kanë idenë se ku. Për më shumë reduktojmë investimet kapitale vetëm në asfalt”, vlerëson VV.
Sipas tyre, politikat qeveritare po e dëmtojnë prodhuesin vendor.
“Vitin 2012 e përfundojmë me qeveri e cila i ka tre ministri për çështjet e zhvillimit ekonomik dhe asnjëra prej këtyre tre ministrive një politikë të vetme ekonomike nuk e shtynë përpara...”, u shprehën anëtarë të Vetëvendosjes.
Sipas VV-së, në Kosovë nuk ka investime sepse nuk ka sundim të shtetit të së drejtës.
“Repubika e Kosovës nuk ka mirëqenie të qytetarëve, por ama ka luks të qeveritarëve”, thekson Vetëvendosje. /Telegrafi/
