FIFA merr nën kontroll Federatën e Argjentinës

Lidershipi aktual i federatës së Argjentinës është akuzuar zyrtarisht për mashtrim me të drejtat televizive dhe kjo ka bërë që FIFA të marrë nën kontroll këtë federatë.

Kur kanë mbetur vetëm edhe dy ditë para finales së Kupës së Amerikës, ku Argjentina do të luaj përball Kilit, FIFA ka njoftuar vendimin e saj për të krijuar një panel emergjent që do të menaxhojë këtë federatë, pasi presidenti i Federatës argjentinase, Luis Segura, u akuzua gjatë të enjtes.

E udhëhequr prej Julio Grondonës që prej vitit 1970, federata ka qenë në periudhë trazirash që pasi ai ndërroi jetë në vitin 2014, teksa mbante edhe pozicionin e zëvendës presidentit të FIFA-s.

Organizmi më i madh i futbollit botëror tha se komiteti i ashtuquajtur ‘i normalizimit të situatës’, që do të përbëhet nga shtatë anëtarë, ‘do të jetë në krye të drejtimit të gjërave të përditshme’ të Federatës argjentinase të Futbollit.

Ndërkohë, zgjedhjet për kreun e ri të këtij institucioni mund të organizohen deri në korrik të vitit 2017. /Telegrafi/