Akuariumi me peshkaqenë shpërtheu në mes të qendrës tregtare (Video)

12:55 / 27.12.2012

As skenaristët më të guximshëm të Hollywoodit nuk do të mundnin ta përshkruajnë skenën që ndodhi në një qendër tregtare në Shangai, ku shpërtheu akuariumi 33 tonësh me peshkaqenë, e që la 15 njerëz të plagosur. Për fat të mirë, para se akuariumit të shkatërrohej, nuk kishte shumë njerëz, se përndryshe numri i të lënduarve do të ishte shumë më i madh.

Kamerat e sigurisë në qendrën tregtare "Shanghai Orient" kanë shënuar këtë ngjarje jo të zakonshme.

Disa vëzhgues qëndronin para akuariumit, pa ditur se xhami do të çahet. Në korridore papritmas u derdh sasi e madhe uji, bashkë me peshkaqenët.

Tash për tash nuk dihet se si ka ndodhur ky incident, ndërsa policia është duke punuar në zgjidhjen e çështjes.

Akuariumi me peshkaqenë dhe lloje të tjera të peshkut dhe kafshëve detare ishte atraksion në këtë qendër tregtare, për çka para çarjes qëndronin shumë njerëz për ta parë.

Tetë nga të plagosurit ishin klientë të qendrës, ndërsa të tjerët punonjës. Shumica e të lënduarve kanë shumë prerje në trup, meqë xhami ishte 15 centimetra i trashë. /Telegrafi/
 

Komente

Portali Telegrafi ka kënaqësinë t'u ofrojë forum të lirë për komente dhe diskutim. Fyerjet dhe përdorimi i fjalëve banale, do të pasoj me përjashtim të menjëhershëm nga komentimi.
Ju lutem lexoni rregullat këtu.