Franco në frigorifer ylli i sallonit të artit modern në Madrid
Skulptura e ish diktatorit spanjoll, Francisco Franco, në frigorifer, ka tërhequr vëmendjen e të gjithë të pranishmëve në Sallonin e Artit Modern në Madrid (Arco) i hapur të mërkurën.Vepra, të cilën e nënshkroi artisti spanjoll Eugenio Merino, paraqet gjeneralin në uniformë, me syze dielli, duke qëndruar në një frigorifer me pllakë të kuqe, ndërsa mbi të është edhe një shirit i bardhë, që i përngjan logos së Coca-Colas.
Skulptura e quajtur “Always Franco” (Përgjithmonë Franco) ka për qëllim të përkujtojë se ish diktatori edhe më tutje është i pranishëm në Spanjë, 37 vjet pas vdekjes.
“Kjo paraqet idenë se njerëzit në Spanjë ende kanë kujtime të freskëta për Francon. Ende vazhdojnë debatet për të. Frigoriferi është vendi ku gjërat mbahen të gjalla dhe të freskëta”, sqaroi artisti. /Telegrafi/
