Kryebashkiaku që e ndërtoi stacionin pranë bizneseve të tij
Kryebashkiaku i qytetit francez Mont Saint-Michel është dënuar me gjashtë muaj lirim me kusht dhe 30.000 euro dënim me para, pasi një rival politik e kishte akuzuar se ka përfituar duke i mashtruar turistët.Eric Vannier e ka vendosur një stacion autobusi në mënyrë që turistët e shumtë që e vizitojnë këtë qytet brenda vitit, të kalojnë pranë dyqaneve dhe restoranteve të tij.
Ai është në krye të bashkisë që nga viti 1983 (ndërsa ka munguar në periudhën 2001-2008) dhe posedon biznese të mëdha, të cilat i sjellin miliona euro në vit.
Padinë e ka bërë rivali disavjeçar politik dhe paraardhësi i tij në këtë post, Patrick Gaulois.
Në vitin 2012 u përmirësuan kushtet për turistët, ndërsa u hap edhe një linjë autobusësh, përmes së cilës turistët udhëtojnë nga parkingu deri te ishulli.
Mirëpo, në vend se stacioni të vendosej në afërsi të parkingut, ai gjendet rreth një kilometër larg, duke i detyruar turistët që të ecin në këmbë pranë dyqaneve dhe restoranteve që i posedon Vannier. /Telegrafi/
