Me 21 dhjetor, fundi i të këqijave (Video)

13:00 / 18.12.2012

Mos kini frikë. E keqja thonë nuk ka fund, por edhe mira është e pafund. Varet se si e sheh situatën. Besoni te më e mira dhe ajo do të ndodhë, kjo gjë vlen edhe për këtë 21 dhjetor.

Nëse do t’u referoheshim majave të famshëm dhe të shumëpërmendur, por edhe spiritualisteve të tjerë nuk ka asnjë arsye përse të frikësohemi në këtë fundviti.

Sipas teorive pozitiviste shpirtërore, periudha në të cilën jetojmë është një periudhë tranzicioni nga një epokë në tjetrën dhe është krejtësisht e natyrshme siç janë të natyrshme ciklet, ndryshimet dhe transformimet në jetën tonë dhe atë të shtëpisë sonë të madhe të përbashkët: Universit.

Vete presidenti i Bolivise, Evo Morales, vendi i të cilit ka qene një ndër tokat në të cilat u zhvillua civilizimi i majave, para disa muajsh deklaroi në Kombet e Bashkuara se 21 dhjetori është fundi i egoizmit dhe fillimi i vëllazërisë, fundi i ndarjes dhe fillimi i bashkimit, fundi i gënjeshtrave dhe fillimi i të vërtetës.

Duke iu referuar majave, kjo periudhe drejt se cilës po shkojmë do të jetë një periudhe tranzicioni shpirtëror drejt një ndërgjegjeje më të lartë.

Ky ndryshim ciklik do të ndodhë, jo vetëm për qeniet që banojnë në këtë planet, por edhe për planetin vetë, sepse asgjë nuk është e ndarë, gjithçka është në unitet dhe ne të gjithë ndikojmë në fatin dhe ardhmërinë e njëri-tjetrit, pretendojnë majat.

Le të mendojmë pozitivisht dhe të besojmë se njerëzimi, pavarësisht gjithë sfidave dhe vuajtjeve që ka kaluar prej mijëvjetarësh ka të ardhme dhe kjo e ardhme do të jetë ajo që ne kemi ndërtuar gjithmonë në zemrat tona, edhe pse rrallë e kemi parë të materializuar në jetë: Një e ardhme ku njerëzit do ta njohin njeri-tjetrin si vëllezër dhe ta trajtojnë si të tillë.

Gjithsesi, për mosbesuesit e dyshuesit, për ata që nuk e dinë kuptimin e fjalës apokalips, që vjen nga greqishtja e lashte, ajo do te thotë: “hapje”, “shpalosje”, “dalje në dritë” e jo shkatërrim e fund.

Edhe në këtë rast do të kishim vetëm të mira, sepse vetëm dalja në dritë e të vërtetave të bën të lirë dhe ky do të ishte dhe fillimi i mbarë i një epoke të re të ngritjes dhe ndriçimit shpirtëror. /TCH/

Komente

Portali Telegrafi ka kënaqësinë t'u ofrojë forum të lirë për komente dhe diskutim. Fyerjet dhe përdorimi i fjalëve banale, do të pasoj me përjashtim të menjëhershëm nga komentimi.
Ju lutem lexoni rregullat këtu.