Policia arrestoi pa të drejtë shtatëvjeçarin – familja kërkon dëmshpërblim
Një djalë shtatëvjeçar është vënë në pranga e më pas është marrë në pyetje për 10 orë nga policia e New Yorkut, për akuzën se ia vodhi pesë dollarët e drekës shokut të tij nëntëvjeçar.Pas marrjes në pyetje, policia rrëzoi të gjitha akuzat e ngritura ndaj fëmijës – raporton New York Post, ndërsa familja e shtatëvjeçarit nuk e ka lënë me kaq dhe ka vendosur të kërkojë nga Departamenti i Policisë së New Yorkut dhe autoritetet lokale një dëmshpërblim prej 250 milionë dollarësh.
Policia e Bronxit e nxori shtatëvjeçarin Wilson Reyes nga klasa në mes të mësimit e më pas e prangosi. Në fillim vogëlushi u mor në pyetje për katër orë në shkollë, e mandej për gjashtë orë të tjera në një rajon policie, transmeton Start.
Në fakt, kartëmonedha për të cilën akuzohej vogëlushi i kishte rënë nëntëvjeçarit përtokë e më pas e kishte marrë një fëmijë tjetër. Pra, Wilsoni u akuzua pa të drejtë.
“Nuk mund ta kisha imagjinuar kurrë atë që policia mund t’i bënte një fëmije”, u shpreh e ëma e Wilsonit, e cila kërkon dëmshpërblim për atë që i ndodhi të birit.
Sipas akuzës së familjes Reyes, “Wilsoni u prangos; u bë objekt abuzimesh verbale, fizike dhe emocionale; u kërcënua, poshtërua, turpërua dhe u tremb”.
Nga ana tjetër, policia pretendon se familja e djalit ka shtrembëruar faktet, por gjithsesi ka hapur një hetim për të verifikuar sjelljen e agjentit që u mor me çështjen. /Telegrafi/
