Truri është vendimtar për goditjet e karateistëve e jo forca e muskujve
Studiuesit britanikë kanë zbuluar se është fuqia e mendjes, e jo forca fizike, ajo që ua mundëson karateistëve të thyejnë tullat vetëm me dorë. Ata vërejtën se trajnimi afatgjatë në artet luftarake sjellë ndryshime në tru. Hulumtuesit krahasuan goditjet e 12 mjeshtërve të karatesë me 12 fillestarë dhe vërejtën se sekreti i brezit të zi nuk fshihet në forcën e muskujve, por te aftësia për të koordinuar shpejtësinë e supeve dhe dorës.
Ky koordinim mundëson arritjen e përshpejtimit të lëvizjes dhe të forcës goditëse, thotë studimi i publikuar në revistën “Cerebral Cortex”.
Gjatë skanimit të truve të vullnetarëve nga të dy grupet, u pa se karateistët me forcë të madhe goditëse kanë ndryshime në masën e bardhë të trurit, që bënë transmetimin e informacionit nga pjesë të ndryshme të trurit. Sa më shumë që trajnojnë karateistët, ndryshimet e tilla janë më të theksuara.
“Mbajtësit e brezit të zi ishin në gjendje të koordinojnë në mënyrë të njëpasnjëshme goditjet në nivelin i cili ishte i paarritshëm për fillestarët”, tha një nga autorët e studimit, Ed Roberts.
Shkencëtarët këtë aftësi e ndërlidhin me përshtatjen e lidhjeve nervore në trurin e vogël, gjë që mundëson lëvizjet tejet të sakta e sinkronizuara të duarve dhe trupit. Ata besojnë se në përparimin e procesit të të mësuarit, disa aftësi përshtaten me modelet e aktivitetit të trurit dhe me këtë edhe ndryshimet në strukturën e trurit.
“Ky zbulim na ndihmon për të kuptuar ndikimin e materies së bardhë në koordinim motorik”, shton Roberts. /Telegrafi/
