U gjet varri i mbretit anglez, Rikardi i III-të?
Arkeologët anglezë pohojnë se kanë gjetur varrin e Rikardit të III-të. Një ekip i hulumtuesve nga Universiteti Leicester tha sot se skeleti i një njeriu u gjet në Leicester, në Anglinë qendrore, në zonën e parkimit ku dikur qëndronte një kishë mesjetare.Kockat janë dorëzuar për testim, por arkeologu Richard Buckley beson se këto janë mbetjet e mbretit Richardi i III-të.
Shkencëtarët shpresojnë se me ndihmën e ADN-së mund të identifikojnë eshtrat.
Kronikat mesjetare thonë se trupi i Rikardit është dërguar në Leicester, 160 kilometra në veri të Londrës, pasi mbreti u vra në betejën e Bosworthit, në vitin 1485.
Trashëgimtari i fundit i dinastisë së Plantagentëve, Rikardi i III-të, që ka sunduar Anglinë në vitet 1483-1485, është i njohur si kurrizoja i ligë nga vepra e njohur e Shekspirit.
Deri sot është besuar se është varrosur në kishën françeskane, vendi i saktë i së cilës është harruar me kohën. Po ashtu ka pasur mendime se eshtrat e tij janë hedhur në lumin e afërt në mesin e shekullit XVI. /Telegrafi/
