Vera 200-vjeçare shitet për 130 mijë euro
Ndër shekuj njerëzit kanë gërmuar në lumenj dhe janë zhytur në thellësi të detit në kërkim të arit apo hartave të thesarit të fundosura së bashku me anije të mistershme piratësh. Megjithatë, në ditët moderne, “ari” që kërkojnë zhytësit në anijet e mbytura quhet verë.Në vitin 2009, tre zhytës amatorë zbuluan 11 shishe vere në një anije të fundosur pranë ujërave të Bordosë dhe vendosën t’i nxirrnin në shitje javën e shkuar, në një ankand në të cilin ata përfituan shumën prej 130.000 eurosh.
Siç transmeton Kosovapress, shishet e verës u analizuan për gjashtë muaj, ndërsa analizat e detajuara treguan se ato ishin hermetike dhe asnjë përqindje uji apo ndotje tjetër nuk kishte hyrë në përbërje. Për më tepër, analizat treguan se vera ishte e cilësisë më të mirë të njohur.
Zbulimi fatlum i bëri tre zhytësit të pasur, ndërsa njëri prej tyre ka vendosur të shpërblejë fatin me të njëjtën “monedhë”. Bruno Lemoine ndërtoi dy fuçi të vogla, në mënyrë që të ishin hermetike dhe i groposi në fund të detit, me verën më të mirë të krahinës së Bordosë të vitit 2009. Ai shpreson që dhjetëra vite më pas, një tjetër fatlum të “bekohet” me të njëjtin fat që pati ai. /Telegrafi/
