Izolimi përfundon nesër

Kosova përfundimisht ka plotësuar të gjitha rekomandimet që Komisioni Evropian ia kishte parashtruar në mënyrë që të fitojë liberalizimin e vizave. Madje, vendimi për liberalizimin e vizave për Kosovën tashmë është i pashmangshëm.

Këtë lajm e ka konfirmuar edhe vetë Komisioni Evropian për gazetën “Zëri” përmes zyrtares së tyre për informim, Mina Andreeva.

“Vendimi për liberalizimin e vizave për Kosovën tashmë është i pashmangshëm”, ka thënë Andreeva për “Zëri.info”, duke shtuar se rekomandimet e nevojshme që ka pasur Kosova tashmë janë plotësuar.

Megjithatë, mbetet ende pikëpyetje nëse Kosova do të jetë pjesë e agjendës së ditës së mërkurë, kur ky Komision pritet që të japë rekomandimin pozitiv për liberalizimin e vizave, edhe pse mediumet ndërkombëtare tashmë kanë konfirmuar 4 majin si ditë kur Kosova pritet që të marrë rekomandimin pozitiv nga Komisioni Evropian. Ndërkohë sipas Andreevas, agjenda përfundimtare e Komisionit Evropian, ku edhe përfundimisht do të merret vesh nëse Kosova do të marrë rekomandimin nesër apo jo, do të konfirmohet vetëm sot në mesditë. “Agjenda e kolegjit për të mërkurën do të konfirmohet sot në mesditë”, ka thënë Andreeva.

Ndërkohë dje shumë i vendosur se çështja e liberalizimit të vizave për Kosovën do të ndodhë brenda ditëve ka qenë edhe presidenti i vendit, Hashim Thaçi.

Ai ka thënë se Kosova ka zbatuar të gjitha kriteret e nevojshme për liberalizimin e vizave dhe se tanimë kanë mbetur çështje orësh deri te finalizimi.

“Mund të them se Kosova ka zbatuar të gjitha kriteret e nevojshme për rekomandimin e vizave nga Brukseli. Prandaj dua të potencoj se procesi për liberalizimin e vizave për Kosovën tanimë nuk është duke i numëruar ditët dhe javët, por mund të themi se është duke i numëruar orët”, theksoi ai. /Zëri/