Këshillat e fakulteteve do të vendosin për emrat e revistave shkencore mbi të cilat avancohen profesorët

Nuk do të ketë konkurs të ri për zgjedhjen dhe avancimin e profesorëve në grada më të larta akademike në Universitetin e Prishtinës.

Do të shkohet me konkursin e vjetër, por do të ketë ndryshim në pikën “më të nxehtë” të këtij konkursi, shkruan “Koha Ditore”.

Do të rishikohet njohja e revistave shkencore, në të cilat kanë botuar punime kandidatët që janë pjesë e konkursit të shpallur në janar të vitit 2015.

Pikërisht kjo ishte çështja, e cila edhe u bë sebep i përplasjeve të mëdha që ndodhën midis ish-menaxhmetit të UP-së dhe Senatit, vitin e kaluar.

Vendimet për këto zhvillime janë marrë në mbledhjen e fundit të Senatit, e cila është mbajtur para dy ditësh, ku me shumicë votash senatorët kanë vendosur që UP-ja në vend se të shpallë konkurs të ri për avancimin e akademikëve, të rishikojë emrat e revistave ku janë publikuar hulumtimet shkencore.

Drejtues të UP-së kanë thënë për “Kohën Ditore” se, megjithatë, ky është vendim i Senatit, por njohës të çështjeve të arsimit paralajmërojnë se kjo mund të rezultojë me tentim për t’iu shmangur kritereve rreth të cilave ka “luftuar” ish-menaxhmenti.