“Eagle 4” kthehet në Atdhe
Kthehen nga Afganistani trupat e kontingjentit ‘Eagle 4’, i pari kontingjent shqiptar që kryente aksione të terren. Pjesë e këtij kontingjenti ishte edhe kapiteni dhe dëshmori i Atdheut Feti Vogli, i cili humbi jetën gjatë një sulmi në Kandahar, nga persona të veshur si policë afganë, më 20 shkurt të vitit 2012.
Bashkë me kapiten Voglin mbeti i plagosur edhe nëntetari Aleksandër Peci, i cili 6 muaj më pas është rikuperuar dhe ndodhet sot në aeroportin “Nënë Tereza” për të pritur shokët e tij.
Komandanti i Forcave Tokësore, gjeneral brigade Viktor Berdo, i uroi mirëseardhjen në atdhe trupave të “Eagle 4” dhe bëri vlerësime të larta për kryerjen me sukses të misionit të tyre në një nga zonat më të vështira të Afganistanit.
Në ceremoninë e organizuar për pritjen e tyre, Shefi i Shtabit të Përgjithshëm të Forcave të Armatosura, Xhemal Gjunkshi përshëndeti kontingjentin dhe i uroi atyre mirëseardhjen në Atdhe, transmeton BW.
Kontingjenti “Eagle 4” përbëhej nga 45 efektive të Batalionit të Forcave Speciale. Ky kontingjent zëvendësoi kontingjentin “Eagle 3”, i cili ndodhej me mision luftimi në terren, në vijën e parë të frontit të luftës në Kandahar, Afganistan. Kontingjenti “Eagle 4” u atashua pranë Komandës së Forcave Speciale Amerikane dhe drejtohej nga Nënkolonel Behar Mara. Ky kontingjent është në përbërje të komandës së forcave italiane në Herat dhe drejtohet nga Nënkolonel Arben Kingji. /Telegrafi/
