Abdullah Gul paralajmëron luftën me Sirinë
Për të gjashtën ditë me radhë, artileria turke granaton Sirinë. Turqit thonë se prapë ishin të detyruar t’i përgjigjen zjarrit që erdhi nga Siria, raporton AP."Po vjen skenari më i keq, të cilit të gjithë ne i jemi frikësuar”, ka thënë Presidenti i Turqisë, Abdullah Gul, duke njoftuar mundësinë që mes dy vendeve të shpërthejë lufta.
Ushtria turke është grumbulluar javën e kaluar përgjatë kufirit me Sirinë, pasi në territorin turk u hodhën dy predha. Në ndërkohë, zjarri u shkëmbye disa herë.
"Eskalimi i konfliktit në kufirin mes Turqisë dhe Sirisë është jashtëzakonisht i rrezikshëm”, tha Sekretari i Përgjithshëm i OKB-së, Ban Ki-moon.
Presidenti Gul i bëri thirrje komunitetit ndërkombëtar për t’u aktivizuar më ashpër rreth konfliktit të brendshëm në Siri, në mes të kryengritësve dhe regjimit të Bashar al-Assadit.
"Tranzicioni, ndryshimi, duhet të vijë sa më shpejt. Shpresa jonë e vetme është që kjo do të ndodhë para se të derdhet më shumë gjak, para se Siria të shkatërrohet vetë në vete. E rëndësishme është që bashkësia ndërkombëtare të ndërmarrë hapa më të vendosur dhe më efektivë”, thotë Gul. /Telegrafi/
