Aksident në Austri, lëndohen familja shqiptare gjashtë anëtarëshe
Në autostradën A8 të Austrisë, mëngjesin e së dielës ka ndodhur një aksident i rëndë në të cilin lëndime kanë pësuar gjashtë persona, të gjithë anëtarë të një familjeje kosovare.
Nga përplasja e fuqishme për murin ndarës të autostradës, vetura me gjashtë udhëtarët është hedhur në ajër disa metra dhe ka kaluar murin ndarës dhe ka mundur të ndalet vetëm pasi është rrotulluar disa herë përskaj rrugës, raporton Albinfo.
Përplasja e fuqishme i ka hedhur në ajër katër nga gjashtë udhëtarët e makinës. Dy të tjerë, ngasësja, 22 vjeçe, dhe babai i saj, 49, vjeçar kanë mbetur në veturë.
Lëndimet më të rënda i kanë pësuar nëna, 47 vjeçe dhe njëra nga motrat, 20 vjeçe, e shoferes. Një vëlla 13 vjeç dhe një motër 17 vjeçe kanë pësuar po ashtu lëndime.
Të gjashtë të lënduarit janë bartur me katër autoambulanca në spitalet e afërta. /Telegrafi/
