Aktakuzë ndaj një ish-gjyqtari dhe një avokati
Prokuroria Speciale e Republikës së Kosovës ka ngritur sot aktakuzë kundër ish- gjyqtarit në Gjykatën Komunale në Klinë, Kolë Puka dhe ndaj avokatit Avdullah Robaj, për shpërdorim të detyrës zyrtare.I pandehuri Kolë Puka akuzohet për kryerjen e veprës penale Shpërdorim i pozitës zyrtare ose i autorizimit nga neni 339 par. 1 lidhur me par. 3 në bashkëkryerje me Avdullah Robaj konform me nenin 23 të KPK-së, e lidhur me veprën penale Nxjerrja e kundërligjshme e vendimeve gjyqësore nga neni 346 i Kodit Penal të Kosovës.
I pandehuri Avdullah Robaj akuzohet për kryerjen e veprës penale Shpërdorim i pozitës zyrtare ose i autorizimit nga neni 339 par. 1 lidhur me par. 3 në bashkëkryerje me Kolë Puka konform me nenin 23 të KPK-së, lidhur me veprën penale Keqpërdorimi i besimit nga neni 269 par 1 lidhur me par 2 të Kodit Penal të Kosovës.
Me kryerjen e veprës penale të pandehurit akuzohen se kanë përfituar më shumë se 71.000,00 euro, duke dëmtuar katër persona.
Aktakuza është ngritur nga një prokuror vendës i Prokurorisë Speciale të Republikës së Kosovës, thuhet në njoftimin e lëshuar nga Prokuroria e Shtetit. /Telegrafi/
