Ambasadoret e Kosovës

10:44 / 3.12.2011

Ministria e Punëve të Jashtme (MPJ), të premten, ka vendosur përfundimisht se kush do të jenë ambasadoret e ardhshme që do ta përfaqësojnë Kosovën në tre shtete të ndryshme.

Burime të besueshme brenda kësaj ministrie, që kanë folur në kushte anonimiteti, i kanë thënë Zërit se ish-kryetarja e bordit të RTK-së, Vjosa Dobruna, dhe dy këshilltaret e kryeministrit Hashim Thaçi, Mimoza Ahmetaj dhe Dhurata Hoxhaj, do të jenë ambasadoret e ardhshme.

“Vjosa Dobruna do të shkojë ambasadore në Romë, Mimoza Ahmetaj në Republikën e Sllovenisë, por nuk është ende e qartë se ku do ta dërgojmë Dhurata Hoxhën”, ka thënë ky burim.

Përzgjedhjen e kandidateve për ambasadore e ka konfirmuar edhe zëvendësministri i Jashtëm, Ibrahim Gashi, i cili ka thënë se kjo listë së shpejti do t’i dërgohet Komisionit Parlamentar për Politikë të Jashtme për shqyrtim.

Nga ana tjetër, Komisioni Parlamentar për Punë të Jashtme është mbledhur të premten, por në mbledhje nuk është diskutuar për emra, meqenëse anëtarët e këtij komisioni nuk e kanë marrë listën në fjalë.

Disa javë më parë Ministria e Punëve të Jashtme ka dërguar në Komisionin Parlamentar për Politikë të Jashtme listën me gjashtë emrat për ambasadorë të rinj. Opozita, ndërkaq, ka dhënë vërejtje për këta emra, meqenëse sipas dispozitave ligjore në fuqi në rastet kur bëhen ndryshime në përfaqësitë diplomatike gjysma e kandidatëve duhet të jenë ambasadorë ekzistues dhe gjysma tjetër ambasadorë që nuk kanë qenë më parë në një pozitë të tillë. /Telegrafi/

 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.