Ankara, grupi marksist merr përgjegjësinë për sulmin në Ambasadën amerikane

18:24 / 2.02.2013

Fraksioni turk i ekstremit të majtë, Fronti Revolucionar për Çlirimin e Popullit, ka marrë përsipër përgjegjësinë për sulmin ndaj ambasadës amerikane në Ankara ditën e premte.

Grupi ka deklaruar se, akti i vetë-sakrifikimit ka goditur Shtetet e Bashkuara të Amerikës, vend që e konsideron si “vrasës të popujve nëpër botë”.

“Luftëtari ynë Alisan Sanli kreu një akt vetë-sakrifikimi më 1 shkurt 2013, duke goditur ambasadën e SHBA në Ankara, vend që vret popujt nëpër botë”, ka deklaruar grupi përmes një njoftimi online.

Fraksioni terrorist, i njohur shkurt me inicialet DHKP-C, konsiderohet si një organizatë terroriste nga administrata amerikane dhe Evropa. Ai është fajësuar për një numër sulmesh që prej vitit 1970, përfshirë disa ndaj misioneve diplomatike amerikane, transmeton TCH.

Atentati i së premtes i mori jetën një rojeje sigurie të ambasadës, ndërtesë e ruajtur mirë, si dhe vetë atentatorit. Pas ngjarjes në fjalë SHBA njoftuan qytetarët e tyre që të mos vizitojnë misionet diplomatike në Turqi deri në një urdhër të dytë.

Departamenti i Shtetit deklaroi se një shtetase turke që po vizitonte ambasadën mbeti e plagosur rëndë nga shpërthimi, ndërsa disa punonjës të ambasadës morën plagë të lehta.

Ndërtesa e ambasadës është e mirëmbrojtur, por Uashingtoni zyrtar ka kohë që planifikon spostimin e misionit në një vend tjetër për arsye sigurie. Së fundmi u raportua se plani ishte në fazat finale të zgjedhjes së lokacionit të ri. /Telegrafi/
 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.