Arrest shtëpiak për drejtorin e spitalit të Gjilanit
Gjykatësi i procedurës paraprake në Gjykatën Komunale në Gjilan i ka caktuar masën e arrestit shtëpiak prej një muaji Xhavit Hajdarit, drejtor i spitalit në Gjilan. Lajmin e ka bërë të ditur Abdylaziz Sadiku avokat i të pandehurit. Sipas tij, gjykatësi Naser Maliqi i ka caktuar masën e arrestit shtëpiak prej një muaji Xhavit Hajdarit drejtor i spitalit në Gjilan.
“Gjykatësi Naser Maliqi merret ekskluzivisht me rastet e ryshfetit dhe kjo ka ndikuar që Hajdari të ndiqet fillimisht vetëm për mito dhe më vonë edhe për rastet tjera të dyshuara dhe të ngritura nga njësiti i krimeve të rënda“, ka thënë ai.
Xhavit Hajdari, drejtor i Spitalit Rajonal të Gjilanit, ishte arrestuar të enjten nga policia e krimeve ekonomike nën dyshimin se ka kryer vepra penale korruptive dhe ka keqpërdorur pozitën e tij zyrtare, duke shkaktuar dëme të mëdha spitalit që e ka menaxhuar.
Në kallëzimin penal kundër tij, thuhet se periudha si drejtor i këtij institucioni shëndetësor është përcjellë me shpërdorime të shumta, duke bërë që ai pas një kohe të ndiqet penalisht për disa nga veprat e bëra, raporton Koha.net. /Telegrafi/
