Arrestohen grabitësit e kazinos në Prishtinë
Dy persona të armatosur, nën kërcënimin e armëve të zjarrit kanë arritur të plaçkitin një kazino në Prishtinë. Pas hetimeve të bëra lidhur me rastin policia ka arritur sot të arrestojë dy autorët e dyshuar.Hetuesit rajonalë të Prishtinës kanë arrestuar R. Berisha, 19 vjeç dhe L. Kaquri, 26 vjeç, që të dy shtetas të Republikës së Kosovës, të cilët dyshohet me bazë të jenë të përfshirë në këtë rast të grabitjes se armatosur .
Ngjarja kishte ndodhur para disa ditësh në rrugën “Robert Doll”, në Prishtinë, saktësisht në një kazino, ku dy autorët, nën kërcënimin e armëve, kanë grabitur para të gatshme rreth 1500 euro.
Duke e marrë si shqetësues denoncimin e bërë, strukturat profesionale të policisë për trajtimin e rasteve të tilla, kanë filluar menjëherë hetimet dhe kanë arritur që t’i identifikojnë dhe arrestojnë dy persona të dyshuar.
Berisha dhe Kaquri janë dërguar në qendrën rajonale të paraburgimit në Prishtinë, ku aktualisht hetuesit po kryejnë të gjitha veprimet e nevojshme hetimore e procedurale lidhur me rastin në fjalë para se rasti t’i kalojë gjykatës. /Telegrafi/
