Arrestohen pesë emigrantë të huaj në Gjirokastër-Tepelenë

Në Aksin rrugor Gjirokastër- Tepelenë, në afërsi të postbllokut të Policisë në Ujin e Ftohtë Tepelenë , në një automjet ”Mercedes benz” taksi që drejtohej nga Nekim Koçi 53 vjeç nga Gjirokastra, udhëtonin 5 të huajt të cilët Koçi i kishte marrë tek Ura e Lumit dhe do ti transportonte deri në Tepelenë.

Mësohet se për të shmangur postbllokun e policisë në aksin rrugor Gjirokastër -Tepelenë në vendin e quajtur Uji i Ftohtë, drejtuesi i automjetit rreth 500 metra pa afruar në postbllok i ka zbritur shtetasit e huaj dhe i ka drejtuar për në shtratin e lumit Drino, me qëllim kalimin me këmbë deri në krahun tjetër të postbllokut të policisë .

Sapo shtetasit e huaj janë drejtuar për në shtratin e lumit Drino janë kapur nga ana e Specialistëve të Sektorit Kundër Narkotikëve dhe Trafiqeve të Paligjshme në Drejtorinë e Policisë së Qarkut Gjirokastër të cilit i kishin mbajtur në vëzhgim të gjitha veprimet dhe lëvizjet e këtyre shtetasve.

Menjëherë të huajt së bashku me drejtuesin e automjetit janë shoqëruar në ambientet e Drejtorisë së Policisë së Qarkut Gjirokastër për veprime të mëtejshme.

Sakaq nga ana e Specialistëve të Seksionit Kundër Trafiqeve të Paligjshme në Drejtorinë e Policisë së Qarkut Gjirokastër ka nisur procedimi penal ndaj drejtuesit të automjetit shtetasit Nekim Koçi, për veprën penale të “Dhënies ndihmë për kalim të paligjshëm të kufirit” .

Ndërkohë në bashkëpunim të ngushtë me Prokurorinë e Gjirokastrës po vijojnë hetimet për të dokumentuar me prova ligjore veprimtarinë e një grupi kriminal në fushën e trafikut të qenieve njerëzore që merren me trafikun e shtetasve të huaj nga Athina në Shqipëri e më pas në Malin e Zi, kundrejt vlerës 1500 euro për person. /Telegrafi/