Arrestohet në Kosovë për trafikim droge në Gjermani
Gjatë një operacioni të përbashkët të kryer në Prishtinë, Njësia e EULEX-it për Hetimin e Krimeve të Organizuara dhe Drejtoria për Hetimin e Trafikimit të Narkotikëve e Policisë së Kosovës e kanë arrestuar sot një person të dyshuar për krim të organizuar dhe trafikim të drogës. Policia bastisi dy lokacione dhe konfiskoi substanca që dyshohen të jenë heroinë dhe marihuanë, dy automjete dhe disa armë, thuhet në njoftimin e lëshuar nga EULEX-i.
I dyshuari ka qenë i kërkuar në Gjermani nën dyshimin se i ka kryer veprat e mësipërme në mes të viteve 2009 dhe 2011. Lënda është transferuar nga Gjermania në Kosovë përmes procedurës për bashkëpunim juridik ndërkombëtar.
Rasti është duke u hetuar nga një ekip i përbashkët i përbërë nga një prokuror i EULEX-it dhe një prokuror vendas nga Prokuroria Speciale e Kosovës (PSRK). /Telegrafi/
