Automatik gruas, e ndalon të takojë fëmijët
I ndarë formalisht, por jo ligjërisht, çifti nga Gramshi ka përfunduar në të shtëna armësh.Burime zyrtare nga policia e Elbasanit bëjnë me dije se 38 vjeçari Edmond Seda, nga fshati Kodovajt i Gramshit, është vënë në pranga në orët e para të mëngjesit të sotëm, nën akuzën se ka vënë në rrezik jetën e gruas së tij, duke e kanosur me armë, madje edhe duke qëlluar me të.
Edmondi prej 5 vitesh jetonte vetëm me djalin dhe vajzën e tij, pasi si pasojë e konflikteve që kishte me bashkëshorten e tij, A. Seda, kjo e fundit kishte shkuar për të jetuar në Itali tek të afërmit e saj.
Nga policia, raporton Noa, thuhet se pas 5 vitesh gruaja ishte kthyer dje në Shqipëri, për të takuar fëmijët e saj. Pasi ka shkuar me vëllain e saj në banesën ku jetonte Edmond Seda, ky i fundit e ka kanosur me automatik, të cilin e mbante pa leje.
Rastësisht, në afërsi të shtëpisë ndodhej një efektiv i policisë i cili ndërhyri në konfliktin mes çiftit. Seda edhe pas kësaj qëlloi disa herë në ajër, dhe u largua, por për më pak se 24 orë u prangos.
Lidhur me këtë rast, materialet i kaluan Prokurorisë së Elbasanit për veprat penale, “Armëmbajtje pa leje, kanosje, prishje rendi dhe të qetësisë publike”. /Telegrafi/
