Babai i Ajshes: Kur shoh foton e vajzës, gati çmendem
Që pas arrestimit të vrasësit të së bijës të dielën e kaluar, Muhamet Vata thyen heshtjen për herë të parë. Por jo pa mundime. Ndjen hidhërim dhe zhgënjim njëkohësisht; që të dyja për vajzën 18-vjeçare, Ajshe, që mëngjesin e hershëm të 11 tetorit iu masakrua nga 80-vjeçari Shaban Norja, pasi kishte abuzuar seksualisht me të ndër vite. Një krim me përmasa horrori, pasi i moshuari nuk u mjaftua vetëm me ekzekutimin me plumb ndaj studentes që ishte në start të Fakultetit të Infermierisë, por edhe i përçudnoi kufomën duke ia ndarë trupin nga koka, që vrasësi e zhduku më pas, shkruan BalkanWeb.
Të dyja pjesët iu bashkuan në varr vetëm dy ditë më parë, pas shumë kërkimesh nga ana e Policisë. Në një ceremoni të vogël rivarrimi, arkivoli u rihap sipas riteve myslimane dhe me vulosjen e arkëmortit, Muhamet Vata kërkon që të mbyllë edhe të gjithë këtë histori dhimbjeje për familjen e tij.
“Që kur është arrestuar monstra (kështu e quan Shaban Norjen) kjo do të jetë hera e parë dhe e fundit që flas, pasi kam dëgjuar dhe lexuar shumë të pavërteta. Është manipuluar opinioni publik. Në fakt, do të ishte mirë që në vendin tim të fliste im atë, si kryefamiljar. Ai është ‘zoti’ i parë i shtëpisë”, sugjeron Muhamet Vata, pas një kohe të gjatë bisede. Nga njëra anë ai e ndjen të nevojshme që të sqarojë gjithçka, por nga ana tjetër kërkon qetësi dhe paqe.
“Ndihem i lodhur, shumë i lodhur. Kur shoh foton e vajzës nëpër televizione apo nëpër gazeta, gati çmendem. Emrin e Shabanit ia dhashë unë Policisë.”- shprehet babai i vajzës. /Telegrafi/
