Bajrush Xhemajlit i shtyhet koha e shkuarjes në burg
Kishte caktuar 18 korrikun si datë kur do të niste vuajtjen e dënimit, por ka arritur ta bindë gjykatën që ta lërë edhe dy muaj në liri. Bajrush Xhemajli nuk është paraqitur të mërkurën në Burgun e Dubravës. Ai i ka kërkuar Gjykatës Komunale të Ferizajt që t’i japë edhe pak kohë për “përfundimin e një terapie mjekësore”.Ish-kryetarit të Komunës së Ferizajt në maj të këtij viti Gjykata Supreme i ka vërtetuar dënimin prej 2 vjet e gjysmë burgim për vepër penale të rrezikimit të trafikut publik, që për pasojë kishte vdekjen e një të riu. Dënimin për këtë vepër penale të shpallur nga Gjykata e Qarkut e Prishtinës në nëntor të vitit 2010 kundër Bajrush Xhemajlit e pati vërtetuar në tërësi Gjykata Supreme e Kosovës me anë të një aktgjykimi.
Por të mërkurën, rreth orës nëntë të mëngjesit, anëtari i lartë i Partisë Demokratike të Kosovës ka kërkuar nga Gjykata Komunale e Ferizajt që të mos ekzekutohet vendimi deri në shtator, njofton “Koha Ditore”.
“Me kërkesën e Bajrush Xhemajlit për ta përfunduar ciklin e terapisë mjekësore të filluar më herët është shtyrë ekzekutimi i vendimit për datën 19 shtator. Ai duhet të paraqitet vetë në këtë datë për ta nisur vuajtjen e dënimit”, ka thënë për “Kohën Ditore” kryetari i Gjykatës Komunale të Ferizajt, Bashkim Hyseni.
Në fakt, 18 korrikun Xhemajli e kishte caktuar vetë. Këtë e pati konfirmuar kryetari i Gjykatës Komunale të Ferizajt, Bashkim Hyseni.
Ish-kryetari i Ferizajt, Xhemajli, i cili nuk ka shkuar në vuajtje të dënimit të mërkurën, pati shkaktuar një aksident në mëngjesin e 21 majit të vitit 2010 në hyrje të Prishtinës. Në atë aksident kishte humbur jetën 21-vjeçari Labinot Rrustemi nga fshati Banullë e Lipjanit, ndërkaq lëndime të rënda kishte marrë Ilir Haziri dhe tre anëtarë të familjes Bytyqi nga Magura e kësaj komune. I lënduar kishte mbetur edhe kryetari i Komunës së Ferizajt, Bajrush Xhemajli, i cili ishte dërguar në Austri për shërim. Por shteti nuk kishte bërë asgjë për të lënduarit e tjerë. /Telegrafi/
