Bashkëpunim në luftën kundër kriminalitetit
"Jemi të gatshëm dhe shprehim vullnetin e plotë për të dhënë kontributin tonë në të gjitha nismat dhe projektet që do të synojnë thellimin e bashkëpunimit dhe rritjen e efikasitetit në luftën kundër kriminalitetit dhe drogës në rajonin tonë", u shpreh ministri i Brendshëm, Bujar Nishani, në një takim sot në mbrëmje me Drejtorin Ekzekutiv të Zyrës së Kombeve të Bashkuara për Krimin dhe Drogën, UNODC, me qendër në Vjenë, Yuri Fedotov, njëherësh zv/Sekretar i Përgjithshëm i Organizatës së Kombeve të Bashkuara. Në takimin që u zhvillua në kuadër të një turi që Fedotov ka ndërmarrë në rajonin me qëllim inkurajimin e bashkëpunimit rajonal në luftën kundër kriminalitetit dhe narkotikëve, ministri Nishani e njohu atë me rezultatet e arritura nga Shqipëria në luftën kundër krimit dhe trafikut të drogës nëpërmjet modernizimit të vazhdueshëm të sistemeve të kontrollit kufitar, të analizës së informacionit kriminal, e mbi të gjitha nëpërmjet bashkëpunimit të ngushtë me të gjithë vendet e rajonit, transmeton BalkanWeb.
Ministri Nishani përmendi ndër të tjera marrëveshjet e bashkëpunimit policor me të gjithë vendet e rajonit, patrullimet e përbashkëta policore, përvojën pozitive të Qendrës Ndërinstitucionale Operacionale Detare në Durrës, pikat e përbashkëta të kontrollit kufitar dhe operacionet e suksesshme të përbashkëta me agjencitë partnere si për goditjen e krimit të organizuar dhe trafikut të drogës, ashtu edhe për identifikimin dhe ndalimin e personave të kërkuar për vepra të ndryshme penale.
Drejtori Ekzekutiv i Zyrës së Kombeve të Bashkuara për Krimin dhe Drogën, Yuri Fedotov, vlerësoi arritjet e Shqipërisë dhe në veçanti përpjekjet dhe prioritetin që ajo ka vendosur për thellimin e bashkëpunimit rajonal në luftë kundër krimit dhe drogës.
"Inkurajoj dhe mbështes fuqimisht të gjithë përpjekjet dhe angazhimin tuaj për forcimin e bashkëpunimit me të gjitha vendet e rajonit dhe organizmat europianë e ndërkombëtarë në luftën e përbashkët kundër fenomeneve të kriminalitetit dhe trafikut të drogës", u shpreh Fedotov. /Telegrafi/
