Bashkohet opozita shqiptare në Bujanoc

Tri subjektet politike shqiptare në Bujanoc, Partia për Veprim Demokratik , Lëvizja e Progresit Demokratik dhe Unioni Demokratik Shqiptar, janë bashkuar dhe kanë koordinuar qëndrimin e tyre për të bojkotuar punën e Kuvendit Komunal të Bujanocit.

Në një kumtesë të përbashkët të tri subjekteve politike shqiptare, thuhet se 18 këshilltarët komunalë nga radhët e partive politike shqiptare e kanë bojkotuar seancën katërt të Kuvendit komunal në Bujanoc.

“Përfaqësuesit e këtyre grupeve të këshilltarëve edhe me këtë rast dëshmuan unitet në veprim duke rikonfirmuar qëndrimin e mëhershëm për mospjesëmarrje në punën e Kuvendit”, thuhet në kumtesë, të cilën e transmeton “Presheva jonë”.

Me këtë rast, 18 këshilltarët shqiptarë njoftojnë opinionin publik se përkundër një fushate agresive që vjen me shpifje, manipulime, trillime, shantazhe dhe kërcënime në adresë të këshilltarëve të opozitës, jemi të vendosur për veprim të përbashkët politik, me qëllim stabiliteti në komunën e Bujanocit.

“Kërkojmë ndërprerjen e menjëhershme të fushatës së kërcënimeve, shantazheve, trillimeve të pushtetit aktual si dhe të militantëve të tyre politik ndaj këshilltarëve të opozitës dhe familjarëve të tyre. Një fushatë e këtillë e egër që po zhvillohet që nga konstituimi i këtij pushteti, ka për qëllim nxitjen e konfliktit ndërshqiptar në Bujanoc dhe destabilizimin e skajshëm të kësaj komune”, thuhet në kumtesë.

Sipas këtyre subjekteve politike, kësaj valleje të pushtetit, po i prijnë disa mediume lokale në mesin e të cilëve prin RTV Bujanoci, medium që financohet nga tatimet e qytetarëve, dhe Ueb portal Titulli.

“Jemi të bindur që opinioni shqiptarë nuk bie pre e një fushate të këtillë agresive, që ka për qëllim nxitjen e më të keqes, dhe se bartësit e kësaj fushate, shumë shpejt do të demaskohen dhe përgjigjen publikisht për këto veprime nxitëse ndërshqiptare”, thuhet në kumtesë. /Telegrafi/