BDI 15.520 amendamente kundër ligjit të 'branitellave'

Miratimin e këtij ligji me procedurë të shpejtuar e përkrahën deputetët e VMRO-DPMNE dhe LSDM opozitare me 79 vota pro, ndërsa kundër ishin vetëm 11 deputetë, kryesisht të partive shqiptare. Në fillim të seancës, propozuesi i këtij ligji ka arsyetuar se përse duhet miratuar ky ligj. "Ky ligj përfshin tre kategori të pjesëtarëve të ARM dhe MPB, kryesisht përbërjen rezerve. Ky ligj përfshin edhe pjesëmarrësit në luftën e ish-Jugosllavisë federale, konfliktin e vitit 2001 dhe pjesëmarrësit në misionet e huaja. Ky ligj nuk është kundër askujt, sepse edhe në armatë dhe polici punojnë pjesëtarë të komuniteteve etnike si shqiptarë, rom, serb, turq dhe vllehë", deklaroi deputeti i VMRO-DPMNE, Vele Gjorgjievski, si propozues i këtij projekt - ligji.

Por, BDI theksoi se ka bërë çmos që të bllokojë që ky projekt - ligj të hyjë në procedurë parlamentare, por tani me amendamente do të mundohen që të parandalojnë sjelljen e tij.

"U tregua se nuk mund të ndalojmë që ky ligj të hyjë në rend dite. Andaj nuk kërkojmë që ai të tërhiqet, por do të bëj të ditur se BDI siç bëri në procedurën e rregullt, ashtu edhe në këtë procedurë po përgatit 15.520 amendamente për të parandaluar sjelljen e këtij ligji", deklaroi shefi i grupit parlamentar të BDI-së, Talat Xhaferi.

Ndërkohë, PDSH kërkoi që ky projekt - ligj të tërhiqet nga rendi i ditës, mirëpo kërkesa e tyre nuk ka marrë dritë jeshile. "Apelojë që ligji të hiqet nga rendi i ditës. Nuk dakordohemi me BDI se nuk duhet të kërkohet që të heqet nga rendi i ditës ky ligj. BDI e bën këtë vetëm për tu reklamuar para popullit, se ata janë kundër. Ato 15 mijë amendamente, më mirë do të ishte të jenë 15 mijë projekte për të mirën e shqiptarëve. Ligji është nacionalist dhe nuk duhet të miratohet në një shtet ku nuk dihet se kush është shumica shqiptarët apo maqedonasit", tha deputeti i PDSH-së, Ziadin Sela. /Telegrafi/