BDI duhet t’i thotë lamtumirë Gruevskit!
Pas përfundimit të samitit të NATO-s dhe mbetjes së Maqedonisë jashtë Aleancës, institucionet duhet të ndërmarrin hapa konkret për të ndërtuar pozicionin se çfarë duhet të ndërmarrin pas këtij samiti, vlerësojnë analistët politikë shqiptarë në Maqedoni.Analisti Naser Zyberi vlerëson se Qeveria duhet të diskutojë urgjentisht rreth situatës së fundit, të mbledhë Këshillin e Sigurisë Kombëtare, më pas të mbledhë në takim liderët e partive politike dhe pastaj Kuvendi të diskutojë dhe të dalë me konkluzione rreth qëndrimit në të ardhmen të Maqedonisë.
Analisti Zyberi thotë se kryeministri Nikola Gruevski ka dy alternativa, të deklarohet se nuk ka ndryshime qoftë edhe me çmimin për të mbetur jashtë NATO-s dhe BE-së ose të jep dorëheqje dhe të thotë se ndryshimi i emrit është kundër bindjeve të tij, raporton Alsat M.
Profesori Bekim Kadriu vlerëson se partia e kryeministrit Gruevski nuk ka për qëllim anëtarësimin e vendit në strukturat euroatlantike, ndaj partia shqiptare në pushtet, Bashkimi Demokratik për Integrim, duhet t’i thotë ‘lamtumirë’ koalicionit.
Edhe analisti Zyberi duke komentuar pozitën e partisë shqiptare në pushtet, tha se ato nuk kanë ndikimin e duhur. Sipas tij, me vet faktin që Gruevski distancohet nga presidenti dhe njerëzit e tij, tregon se ai ka në dorë të gjitha mekanizmat.
“BDI në mënyrë permanente është angazhuar, disa herë është kërcënuar madje edhe me braktisje të Qeverisë dhe asnjëherë nuk e ka bërë, prandaj do të ishte e tepërt që të thuhet diçka më tepër, asgjë në fakt nuk varet, fatkeqësisht prej faktorit shqiptar rreth këtij problemi. Gjitha mekanizmat gjenden në duart e një personi”, tha Zyberi. /Telegrafi/
