BE kërkon nga Beogradi fleksibilitet në dialog
Drejtori i përgjithshëm për Zgjerimin në Komisionin Evropian, Stefano Sanino u ka thënë autoriteteve serbe se dialogu me Kosovën duhet të jetë fleksibil, pa trysni dhe pa përfshirjen e idesë së ndarjes së Kosovës, e cila nuk do të ishte një zgjidhje pozitive.Sanino, i cili po kryeson një delegacion të BE-së në Beograd, është takuar me këshilltarin e presidentit serb, Marko Gjuric, të cilit i ka bërë të qartë se Brukseli pret nga zyrtarët serbë që të dalin me ide konkrete për zgjidhjen e çështjes së Kosovës para strukturave të larta të BE.
Ndër të tjera, Sanino ka vlerësuar synimin e Serbisë për të qenë anëtare me të drejta të plota në BE proces për të cilin Brukseli ka vendosur si kusht normalizimin e marrëdhënieve me Kosovën, transmeton Koha.net.
Sipas mediumeve serbe, Sanino ka nënvizuar se afatet kohore të dialogut do të jenë fleksibil, në mënyrë që të mos ketë trysni, dhe ka shtuar se Perëndimi është optimist se procesi mund të zhvillohet me ritme të kënaqshme.
Në anën tjetër këshilltari i presidentit serb ka garantuar vazhdimin e shpejtë të negociatave në nivel politik me Kosovën dhe ka shprehur bindjen se në ditët e ardhshme Serbia do të ketë gati platformën për bisedimet.
Ndërkohë, përfaqësuesi special i BE-së në Kosovë, Samuel Zbogar ka deklaruar se problemi më i madh i Beogradit dhe Prishtinës është normalizimi i marrëdhënieve ndërmjet tyre. /Telegrafi/
