Berisha: Heqja e imunitetit, transparencë dhe barazi
Kryeministri i Shqipërisë, Sali Berisha në fjalën e mbajtur gjatë përurimit të portalit ‘online’ gjyqësor në Ministrinë e Drejtësisë shprehu mirënjohje për Komisionin Evropian dhe Bankën Botërore, për financimin e bërë.Berisha tha se ky sistem nënkupton qytetarin në gjykata, publikun në gjykata dhe që çdo qytetar të njihet në çdo qelizë të veprimtarisë së gjyqësorit.
“Kjo përbën një ndihmë të jashtëzakonshme në radhë të parë për ju anëtarët e trupave gjykuese të vendit, kjo përbën një proces i cili do tu ndihmojë ju për të rritur shkallën e përgjegjshmërisë, por do të bëjë që publiku të vlerësojë gjithnjë e më shumë, punën tuaj, seriozitetin tuaj, përgjegjshmërinë tuaj, në zbatim të ligjeve të vendit. Jam i bindur se Këshilli i Lartë i Drejtësisë do të ketë një sistem ndihme shumë të madhe për të vlerësuar në bazën e meritës secilin gjykatës apo gjykatëse të këtij vendi”, u shpreh Berisha, citon Noa.
Lidhur me çështjen e imunitetit Berisha theksoi se “Ne duhet të ndihemi krenar me kërkesën tonë për heqjen e imunitetit, sepse kjo do na bëjë më transparentë më të barabartë përpara ligjit. Fatkeqësi është se në rast se pushteti pasurohet në mënyrë të paligjshme, heqja e imunitetit nuk synon veçse parandalimin, ndaj të gjitha rasteve që pushteti përdoret për favore dhe për pasurim të paligjshëm”. /Telegrafi/
