Berisha priti kreun e komunës Çair të Shkupit
Kryeministri i Shqipërisë, Sali Berisha ka pritur sot në një takim kryetarin e komunës Çair të Shkupit,Izet Mexhiti, me ç’rast Berisha e ka përgëzuar kryetarin Mexhiti për vendosjen e shtatores së heroit tonë kombëtarë Hasan Prishtina në Shkup në 100 vjetorin e Pavarësisë së shtetit shqiptar. U vlerësua se vendosja e përmendores së Hasan Prishtinës është e një rëndësie të madhe historike. Ai gjithashtu e përgëzoi kryetarin Mexhiti për aktivitetet që janë duke u organizuar në Shkup me rastin e 100 vjetorit të Pavarësisë si dhe marrjen e mirënjohjes nga ana e Parlamentit të Republikës së Shqipërisë, transmeton INA.
Mexhiti dhe Berisha biseduan edhe për funksionimin e pushtetit lokal dhe bashkëpunimi i komunave shqiptare nga Maqedonia dhe Shqipëria.
Kryetari i komunës së Çairit theksoi se me decentralizimin e pushtetit konform Marrëveshjes së Ohrit komunat kanë më shumë kompetenca më qëllim që pushteti qendror të jetë me afër qytetarëve.
Kryeministri Berisha dhe kryetari Mexhiti biseduan edhe për situatën politike në vend dhe procesin e integrimit në strukturat euro-atlantike ku u nënvizua bashkëpunimi në këtë drejtim sepse anëtarësimi në Bashkimin Evropian është prioritet i të dy vendeve.
Ndryshe, të premten në Tiranë kryetari i Komunës së Çairit, Izet Mexhiti nga kryetarja e Parlamentit të Republikës së Shqipërisë, z-nj Jozefina Topalli u nderuar me një mirënjohje si dhe me riprodhimin simbolik të Akteve zyrtare të themelimit të shtetit shqiptar. Komuna e Çairit në Shkup ishte një prej katër komunave shqiptare, Prizrenit, Vlorës dhe Ulqinit të cilët u nderuan me të njëjtat mirënjohje me rastin e 100 vjetorit të shënimit të Pavarësisë së shtetit shqiptarë. /Telegrafi/
