Berisha: Referendumi, në respektim të Kushtetutës
Kryeministri i Shqipërisë, Sali Berisha deklaroi të martën se referendumi për heqjen e imunitetit do të bëhet në respektim të plotë të Kushtetutës, ndërsa theksoi se koha kur do të zhvillohet do të përcaktohet nga komisionet përkatëse. Duke folur në mbledhjen e qeverisë, kryeministri theksoi se ndërkombëtarët kanë kërkuar heqjen e imunitetit, për të ndalur korrupsionin.
Sipas shefit të qeverisë, në vend ka politikanë që nuk pranojnë të heqin mburojën e imunitetit, ndërsa theksoi se ky prioritet i vendosur nga Bashkimi Evropian duhej të arrihej me konsensus të plotë, transmeton Top Channel.
“Kryetari socialist, Edi Rama bllokoi për të tretën herë statusin e vendit kandidat për Shqipërinë. Bllokimi i heqjes së imunitetit, nuk pengon dot vullnetin e qytetarëve. Rama duhet të mbrojë interesat e socialistëve dhe qytetarëve”, tha Berisha.
Në seancën e fundit parlamentare për këtë sesion, pasi ka dështuar votimi për heqjen e imunitetit, kryeministri Sali Berisha paralajmëroi mbajtjen e një referendumi popullor për këtë çështje.
Më herët gjatë fjalës së tij, kryeministri akuzoi deputetët e opozitës se me veprimin e tyre për të mos e votuar heqjen e imunitetit, po shkelnin interesat parësore të votuesve të tyre
Ndërkohë kryetari i PS, Edi Rama ka reaguar të hënën në mbrëmje në Twitter pas njoftimit të kryeministrit Berisha për mbajtjen e referendumit për heqjen e imunitetit.
Në mesazhin e postuar në rrjetin social, Rama fton shefin e qeverisë që të votohet për të gjitha ndryshimet kushtetuese dhe të shihet se cila palë, pozita apo opozita, do të ketë mbështetjen e popullit. /Telegrafi/
