Beton edhe në Kalanë e Krujës
Betoni vazhdon të pushtojë qytetet dhe objektet e trashëgimisë kulturore-historike, duke mos u ndalur as para portave të Kalasë së Skënderbeut në Krujë, ku historia na thotë se janë ndalur taborët e ushtrive osmane.Prej disa ditësh, në hyrje të kësaj kalaje ka nisur të ngrihet një ndërtesë e madhe prej betoni, siç njoftohemi, me lejen e bashkisë së këtij qyteti. Sikur të mos mjaftonin pallatet, të cilët zënë pamjen e kalasë në këtë qytet, ndërtimi që po kryhet në hyrje të portës së kalasë, mund të përbëjë një tjetër rrezik për këtë kala. Ndërsa kjo kala është pronë e Ministrisë së Kulturës, leja për ngritje këtyre ndërtimeve është dhënë nga ana e Bashkisë së këtij qyteti.
Askush nga punonjësit e muzeumit dhe kalasë së Krujës, nuk pranon te prononcohet për dëmet që po i bëhen kësaj kalaje dhe trashëgimisë historike, pasi është Ministria e Kulturës ajo që përgjigjet për të. Ndërsa ndërtuesit kanë vendosur një tabelë në hyrje të punimeve, ku tregojnë se është Bashkia e këtij qyteti që ka dhënë leje për ngritjen e një ndërtese e cila do të shërbejë për dyqane dhe apartamente të banimit, transmeton TCH.
Kjo ndërtesë në hyrje të kalasë dëmton, si imazhin e vetë kalasë, ashtu edhe atë të pazarit të vjetër të Krujës, të dyja këto objekte pjesë e fondit të artë të trashëgimisë sonë kulturore e historike. /Telegrafi/
