Bisedimet për veriun ndryshojnë delegacionet në dialog

Zyrtarët në Bruksel të involvuar në procesin e dialogut teknik tashmë janë të përgatitur për mundësinë që në krye të delegacionit të Beogradit të mos jetë më Borislav Stefanvic. Në qarqet e Brukselit thuhet se edhe nëse Partia Demokratike e Boris Tadicit formon koalicionin qeveritar, Stefanovic ka gjasa të merr ndonjë post më të rëndësishëm në atë qeveri, raporton RTK.

Ndërsa në skenarin tjetër, ku qeveria do mund të formohej në mes të partive nacionaliste, atëherë do tw duhet të pritet, e të shihet se çfarë qasje do ketë qeveria e re e Serbisë ndaj dialogut dhe nëse do t’i implementojë marrëveshjet që janë arritur deri në këtë moment.

“Në rast se formohet qeveria me partitë e Tomislav Nikolicit dhe Vojislav Kostunicës atëherë duhet të presim një kohë për të parë nëse kjo qeveri serbe do tw orientohet kah Brukseli, apo kah Moska”, u shpreh një diplomat evropian, për RTK-në.

Sipas këtij burimi, edhe këtij formacioni të mundshëm, Brukseli do t’ ia bëjë me dije se nëse i dëshirojnë integrimet, kushti mbetet dialogu dhe zbatimi i marrëveshjeve në dialog.

Nuk është vetëm delegacioni serb ai i cili pret ndryshime. Diplomatët në Bruksel paralajmërojnë se ndryshimet mund të ndodhin edhe tek ekipi kosovar, madje edhe tek ndërmjetësit evropianë.

Ndryshimet do të ndodhin në rast se vendoset që negociatat të marrin format tjetër – atë politik.

“Nëse vendosim që menjëherë të nisim temën e veriut natyrisht se asnjëri nga aktorët aktualë nuk do të ulet më në tryezën e negociatave”, tha një diplomat evropian. /Telegrafi/