Braçe kërkon sqarim nga Nishani për të kaluarën e Likës
Deputeti socialist, Erion Braçe, ka kërkuar nga presidentit Bujar Nishani sqarimin e të kaluarës së kreut të ri të Shërbimit Informativ Shtetëror, Visho Lika. Në rrjetin social Facebook, Braçe shkruan se Nishani duhet të sqarojë nëse Lika ka marrë nënshtetësi kanadeze, duke kërkuar azil politik në Kanada pas ngjarjeve të vitit 1997.
“Presidenti Nishani duhet të përgjigjet: Çfarë shtetësie ka drejtori i Shërbimit Informativ të Shtetit, zoti Visho Lika? A ka marrë shtetësi kanadeze drejtori i SHISH? A ka marrë azil të çdo forme në Kanada drejtori i SHISH?”, shprehet Braçe.
Ai shton se duhet sqaruar sesi mund të emërohet drejtor i Shërbimit, një njeri që është shpallur kundërshtar me opozitën, nëse ka marrë azil politik.
“Në cilin mbiemër drejtori i SHISH i ka këto statuse? Nëse ka marrë azil politik, pra si kundërshtar i qeverisë socialiste të pas 1997-së, atëherë si mund të emërohet në detyrën e drejtorit të SHISH një njeri i shpallur kundërshtar me opozitën? Presidenti Nishani duhet të na përgjigjet!! Dekreti ishte i tij!”, shprehet deputeti socialist Erion Braçe. /Noa/Telegrafi/
