Brukseli mbështet tërësinë e Kosovës
Letrat janë hapur. Në të njëjtën kohë, edhe Brukseli, edhe Beogradi, kanë dalë me qëndrimet e tyre se si do t’i referohen Kosovës në të ardhmen. Së pari, Komisioni Evropian, në një raport mbi progresin edhe zyrtarisht e ka ndërlidhur rrugën evropiane të Serbisë me Kosovës, gjë që deri tash nuk ka ndodhur. Bashkimin e dy rrugëve në një e kanë cekur shefat e shteteve apo qeverive në Samitin e dhjetorit, me arsyetimin që të dihet saktë se cilat janë kushtet që qëndrojnë para Serbisë.
Qeveria serbe u përgjigj me platformën e fundit, në të cilën theksin e vë në veriun e Kosovës dhe enklavat serbe. Nga Brukseli ende e peshojnë këtë dokument, dhe disa pjesë tashmë janë cekur si të pranueshme. Megjithatë, nuk ka qëndrim final për këtë platformë.
“Qëndrimi ynë është i qartë dhe kjo është theksuar në konkluzionet e Këshillit të Evropës të 11 Dhjetorit”, ka thënë për “Novosti” zëdhënësja e Përfaqësueses së Lartë të BE-së, Maja Kocijancic.
Kjo praktikisht do të thotë se Brukseli do të këmbëngulë në tërësinë administrative të Kosovës. Nga platforma serbe do të pranohet gjithçka që është në përputhje me raportin e Komisionit Evropian, duke përfshirë financimin e aktiviteteve të komunitetit serb në Kosovë nga buxheti serb - në një mënyrë transparente.
BE, nga ana tjetër, nuk do të kërkojë nga Beogradi të njohë pavarësinë e Kosovës, sepse këtë nuk po e bëjnë as disa shtete të BE-së.
Për Brukselin, në thelb, është e rëndësishme që të mos ketë pengesa për procesin e integrimit të Serbisë dhe Kosovës, të cilat BE i trajton si dy tërësi të veçanta administrative. /Telegrafi/
