Cameron vizitë të papritur në Libi

15:47 / 31.01.2013

Kryeministri britanik, David Cameron ka arritur në një vizitë të papritur në Libi, në etapën e dytë të turit të tij në Afrikë. Ai udhëtoi në kryeqytetin Tripoli pasi përfundoi vizitën në Algjeri.

Downing Street kërkoi mosinformimin e mediave për vizitën në Libi për arsye sigurie, bën të ditur rrjeti informativ britanik, BBC.

Kryeministri ka ecur në Sheshin e Martirëve në Tripoli, pasi ka folur me rekrutët e policisë libiane, të cilët po trajnohen nga kolegët britanikë.

Cameron është takuar ndërkohë me ministrin e Brendshëm libian, ndërsa aktualisht po zhvillon një takim me kryeministrin e vendit, njofton TCH.

Më herët gjatë javës, Foreign Office paralajmëroi për një “kërcënim potencial” ndaj ambasadës britanike në Tripoli.

Paralajmërimi erdhi një javë pasi shtetasve britanikë iu kërkua të largoheshin nga qyteti i dytë i vendit, Bengazi, për shkak të kërcënimeve që u kanoseshin perëndimorëve.

Në shtator të vitit 2011, Cameron udhëtoi për në Bengazi bashkë me presidentin e atëhershëm francez Nicolas Sarkozy, për festuar çlirimin e vendit nga koloneli Muammar Gaddafi.

Por situata e sigurisë që atëherë është përkeqësuar. Teksa kryeministri takonte rekrutët e policisë në Sheshin e Martirëve, helikopterë të policisë patrullonin gjatë gjithë kohës zonën, bashkë me forcat e sigurisë në tokë.

Cameron ka thënë se Britania do të sigurojë më shumë asistencë për oficerët e policisë në trajnim e sipër, teksa ndoqi edhe ceremoninë e diplomimit të disave prej tyre. /Telegrafi/
 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.