Çka tha Hague në Beograd?
Shefi i diplomacisë britanike, William Hague, ka thënë në Beograd se Serbia duhet ta vazhdojë dialogun me Prishtinën, të zbatojë marrëveshjet e arritura dhe të shënojë progres në eliminimin e struktura paralele të sigurisë në veri, thuhet në deklaratën e Ambasadës britanike në Beograd."Këta janë hapat konkrete që Serbia mund të arrijë në një periudhë relativisht të shkurtër, e që mund të bindin Bashkimin Evropian për angazhimin e Serbisë për marrëdhënie të mira me vendet fqinje", tha Hague, i cili çmoi edhe takimin në Bruksel në mes të kryeministrit të Kosovës Hashim Thaçi, dhe atij serb Ivica Dacic.
Në një intervistë për RTS, në pyetjen nëse kishte porosi të veçanta për Beogradin e Prishtinën, ai thotë: “Mesazhi është se ky është një moment me rëndësi që duhet të shfrytëzohet. Ky është moment kur e tërë bota po shikon në këtë drejtim. Serbia ka fituar kandidaturën (për anëtarësim në BE-v.j.), ndërsa tash të gjithë presin të nisin bisedimet. Koleget e mia do të vijnë shpejtë këtu, Hillary Clinton dhe Catherine Ashton. Këtë moment duhet ta shfrytëzoni për përparime”. /Telegrafi/
