Clinton do t’i “bashkojë” Berishën e Ramën
Deputeti Kastriot Islami e cilëson vizitën e Sekretares së Shtetit të SHBA, Hillary Clinton në Shqipëri si një rast për të afruar mazhorancën me opozitën. Për rrjedhojë, ai shprehet se kjo do të sjellë edhe plotësimin e tre kushteve të fundit për marrjen e statusit kandidat për anëtarësimin në BE. Islami i bën thirrje ish-grupit parlamentar, që të mos “djegë” mundësinë e marrjes së statusit kandidat, por të miratojë ligjet që kërkojnë shumicë të cilësuar.
“Opozita duhet të votojë të tre ligjet për të mos rrezikuar marrjen e statusit të vendit kandidat në BE. Nuk ka asnjë arsye apo kusht, që duhet të vinte në rrezik këtë projekt të shqiptarëve. Kam besim vetëm tek mesazhi i Clintonit, që do të shërbejë për të kapërcyer këtë moment”, shkruan Islami në rrjetin social “Facebook”.
Sekretarja amerikane Hillary Clinton do të vizitojë Tiranën më 1 nëntor, ku gjatë qëndrimit për rreth tri orë do të takohet me drejtues të lartë të shtetit dhe përfaqësues të opozitës, poa shtu do të mbajë një fjalim në Kuvendin e Shqipërisë. /Telegrafi/
