Clinton uron Nishanin
Ambasadori i Shteteve të Bashkuara të Amerikës, Aleksandër Arvizu i ka përcjellë të mërkurën urimin e sekretares amerikane të Shtetit, Hillary Clinton, presidentit të Shqipërisë, Bujar Nishani.“Dëshiroj t’ju përcjell urimet e mia më të ngrohta me rastin e zgjedhjes tuaj si President i Shqipërisë. Unë pres që të punoj me ju për të ndihmuar në forcimin e demokracisë në Shqipëri dhe përparimin e aspiratave evropiane të popullit shqiptar”, thuhet në letrën e Clintonit.
Sipas sekretares amerikane, shkruan “Oranews” roli i Nishanit si president është jetik për garantimin dhe zhvillimin e demokracisë në Shqipëri dhe ka shprehur bindjen se integriteti dhe pikëpamjet e presidentit Nishani tuaja do të përputhen më së miri me përgjegjësitë e larta që i janë besuar Presidentit të Republikës.
“Shtetet e Bashkuara kanë angazhimin për të mbështetur punën tuaj të rëndësishme për të garantuar pavarësinë dhe efektivitetin e institucioneve shqiptare”, shkruan Clinton.
Gjatë takimit ndërmjet presidentit, Bujar Nishani dhe ambasadorit Arvizu u vlerësua bashkëpunimi i shkëlqyer me ambasadën e SHBA, i Ministrisë së Brendshme dhe Ministrisë së Drejtësisë gjatë drejtimit të tyre nga Nishani, si dhe u shpreh angazhimi për të vijuar me të njëjtin nivel bashkëpunimi.
Në takim u nënvizua rëndësia e rolit të Presidentit të Republikës dhe kontributi i tij për forcimin dhe konsolidimin e institucioneve të pavarura. /Telegrafi/
