Cooper: Palët janë shumë larg njëra tjetrës
Zëvendëskryeministrja e Kosovës, Edita Tahiri ka zhvilluar të premten pasdite një bisedë përmes videolidhjes me ndërmjetësin evropian, Robert Cooper, në kuadër të përgatitjeve për raundin e ardhshëm të dialogut teknik me Serbinë.Tema kryesore të bisedës ishin çështja e bashkëpunimit rajonal, situata në zbatimin e marrëveshjeve, si dhe procesi i finalizimit të protokollit teknik të marrëveshjes për Menaxhimin e Integruar të Kufijve.
Sipas komunikatës nga zyra Tahirit, lidhur me bashkëpunimit rajonal, zv/kryeministrja ka theksuar se Kosova duhet të marrë pjesë si shtet i pavarur dhe sovran, me simbolet e saja shtetërore dhe të jetë nënshkruese e marrëveshjeve rajonale, si dhe ka hedhur poshtë propozimet e Serbisë për çfarëdo referencash që nuk përkojnë me realitetin, duke thënë se Rezoluta 1244 është e tejkaluar juridikisht dhe politikisht.
Pos tjerash, Tahiri ka kërkuar që të zbatohen plotësisht marrëveshjet e arritura për lëvizjen e lirë dhe tregtinë e lirë, si dhe ka kërkuar që BE-ja të bëjë presion të shtuar mbi Serbinë për të hequr pengesat, si dhe për të hequr tarifat për sigurimin e automjeteve dhe rritjen e dinamikave në zbatimin e të gjitha marrëveshjeve.
Nga ana e tij, ndërmjetësi i BE-së në dialog, thuhet se ka marrë në dijeni qëndrimet dhe kërkesat e palës kosovare dhe ka premtuar angazhim për të përafruar qëndrimet e palëve për çështjen e bashkëpunimin rajonal, të cilat tash për tash janë shumë larg njëra-tjetrës. Ai po ashtu ka premtuar angazhimin e tij për të përshpejtuar procesin e zbatimit të marrëveshjeve të arritura deri më tash. /Telegrafi/
