Dacic: SHBA dhe BE nuk duhet të na shantazhojnë
Ne i kemi vijat tona të kuqe, dhe njëra prej tyre është mosnjohja e pavarësisë së Kosovës. Për çdo problem tjetër, ne jemi të gatshëm për të ofruar zgjedhje praktike, ka deklaruar kryeministri serb, Ivica Dacic. “Ky do të jetë thelbi i dialogut tonë. Por, ne gjithashtu presim që rrethanat e tanishme të jenë të shoqëruara edhe me përshpejtimin e integrimit të vendit tonë", ka thënë ai.
Kryeministri serb ka shtuar se nuk do të ketë kushte të vështira që do të caktohen dhe se askush nuk do të shantazhojë autoritetet e Beogradit me njohjen e Pavarësisë së Kosovës.
Siç mëson “Blic”, temat kryesore të dialogut politik në mes të Beogradit dhe Prishtinës janë të përcaktuara nga Brukseli. Temat janë prezantuar edhe në takimin e parë joformal në mes të Thaçit dhe Dacicit në Bruksel. Por, mund të ndodhë që vetë Ashton të dorëzoj listën temave në dialogun e ardhshëm në mes Prishtinës dhe Beogradit.
Temat e dialogut politik pritet të jenë institucionet paralele në veri të Kosovës, por edhe ato që Prishtina do të ofrojë në territorin me popullsi serbe.
Temë e dialogut politik pritet të jetë edhe pjesëmarrja e Kosovës në takimet rajonale. Po ashtu, është e mundur që njëra nga propozimet të jetë edhe themelimi i zyrave ndërlidhëse në mes Beogradit dhe Prishtinës. /Telegrafi/
