Debat me shoqërinë civile për dialogun me BE-në
Sekretariati për çështje evropiane sot organizoi debat me përfaqësues të shoqërisë civile në Republikën e Maqedonisë, kushtuar realizimit të obligimeve të Dialogut Aderues të Nivelit të Lartë.Me këtë rast, zëvendëskryeministrja e Qeverisë së Republikës së Maqedonisë për çështje evropiane Teuta Arifi e prezantoi Raportin e Qeverisë së Republikës së Maqedonisë për Komisionin Evropian rreth statusit të realizimit të aktiviteteve të parapara me Udhërrëfyesin për realizimin e objektivave prioriteteve të Dialogut Aderues të Nivelit të Lartë.
Në fjalën e saj zëvendëskryeministrja Arifi theksoi se takimi i sotëm është edhe një konfirmim për transparencën me të cilën bëhet qasja në realizimin e këtij procesi, dhe gjithashtu paraqet edhe mundësi që të dëgjohen qëndrimet dhe sugjerimet shoqërisë civile.
Sa i përket progresit të shënuar zëvendëskryeministrja Arifi theksoi se është vlerësuar arritja e marrëveshjes për dekriminalizimin e shpifjes dhe ofendimit. Krahas kësaj, Qeveria ka miratuar raportin për zbatimin e Marrëveshjes Kornizë të Ohrit ndërsa në vazhdimësi po kryhen edhe aktivitete në pjesën e reformave zgjedhore e cila përbëhet prej ndryshimit të Legjislacionit zgjedhor dhe kontrollimit të Listës Zgjedhore.
Përfaqësuesit e shoqërisë civile u pajtuan me faktin se Dialogu Aderues i Nivelit të Lartë është i rëndësishëm për procesin e integrimit evropian, por theksuan se duhet të ekzistojë transparencë më e madhe dhe përfshirje më e madhe e faktorëve të tjerë shoqëror në procesin e planifikimit dhe realizimit të aktiviteteve, transmeton INA.
Raporti për realizimin e Udhërrëfyesit operativ u prezantua dhe u shqyrtua edhe nga anëtarët e organeve përkatëse parlamentare, Komisioni për Çështje Evropiane dhe Këshilli Nacional për Eurointegrime. /Telegrafi/
