Dënohen kërcënimet dhe ndërtimi pa leje i xhamisë në Matiçan
Iniciativa për Progres si organizatë që monitoron punën e komunës së Prishtinës (INPO) dënon sjelljen e pahijshme ndaj medieve dhe kërcënimet që i janë bërë përfaqësuesve të komunës së Prishtinës në rastin e përpjekjeve për ndalimin e punimeve në ndërtimin pa leje të një xhamie në lagjen Matiçan, ku Bashkësia Islame e Kosovës ka nisur punimet pa lejen përkatëse dhe në kundërshtim me ligjin.“I bëjmë thirrje Bashkësisë Islame të Kosovës që të distancohet nga sjelljet dhe deklarimet e Kryetarit të Bashkësisë Islame për komunën e Prishtinës, Bahri Sejdiu, i cili ka cenuar ligjin, ka kërcënuar dhe ka nxitur urrejtje ndaj drejtorit të Inspektoratit të komunës, Muhamet Gashi”, thuhet në një komunikatë të INPO-s.
INPO përmes kësaj deklarate mbështetë veprimin e organeve komunale kundër ndërtimeve pa leje dhe uzurpimit të hapësirës publike në komunën e Prishtinës. Sipas kësaj iniciative, bashkësitë fetare në Kosovë duhet të jenë promotorë të sundimit të ligjit dhe shembull i respektimit të shtetit, por jo e kundërta.
”Kushtetuta e Kosovës e përcakton qartë vendin si një shtet sekular dhe neutral ndaj të gjitha përkatësive fetare dhe çfarëdo përpjekje për të sfiduar këtë karakter të shtetit të Kosovës përbën shkelje të kushtetutës”,.
INPO nuk është kundër ndërtimeve të objekteve fetare pavarësisht cilët besim i takojnë ato, por legjislacioni në fuqi duhet të respektohet nga qytetarët dhe bashkësitë fetare. /Telegrafi/
