Dhunuesit serbë në pranga

Trembëdhjetë vjet pas lufte, policia e EULEX-it dhe ajo e Kosovës kanë arrestuar dy serbë në dy fshatra të ndryshëm.

Të dy serbët e arrestuar janë mbi moshën 60 vjeçare, përderisa njëri është pjesëtar i Policisë së Kosovës. Të dy dyshohet se kanë kryer krime lufte dhe dhunime në prill të vitit 1999

Gazeta Express ka arritur t’i sigurojë dy emrat e serbëve të arrestuar. Ai që është arrestuar në fshatin Babimoc quhet Gjorgje Bojkovic, i lindur më 1940.

E pjesëtari i Policisë së Kosovës gjithashtu i arrestuar nga EULEX është Jovica Dejanovic, rreth 60 vjeçar.

Sipas burimeve të gazetës, gjatë kohës së bastisjes në shtëpinë e këtij pjesëtari të policisë, njësitet speciale të EULEX e Policisë së Kosovës kanë konfiskuar një kallashnikov.

“Jovica Dejanovic në dy vitet e fundit ka shërbyer si pjesëtar i Policisë së Kosovës në stacionin policor në Vushtrri. Ndaj tij në këto dy vitet sa ka punuar këtu nuk ka pasur asnjë ankesë”, ka rrëfyer një burim i gazetës.

Sipas këtij burimi, Dejanovic ka disa vjet që është i punësuar në radhët e Policisë së Kosovës.

Zyrtarë të Misionit Evropian për Sundimin e Ligjit në Kosovës kanë konfirmuar rastin, duke thënë se në orët e hershme të mëngjesit të së enjten kanë arrestuar dy persona për krime lufte dhe dhunim.

“Gjatë një aksioni të përbashkët të Policisë së EULEX-it dhe Policisë së Kosovës janë arrestuar dy persona lidhur me një rast të krimeve të luftës. Dy të dyshuarit janë duke u hetuar mbi supozimet se kanë kryer krime lufte të dhunimit në prill 1999 në Kosovë”, thonë zyrtarë të EULEX-it.

“Operacioni i përbashkët, i kryer nga Njësia për Hetimin e Krimeve të Luftës (NJHKL) e Policisë së EULEX-it dhe Njësia për Hetimin e Krimeve të Luftës e Policisë së Kosovës (NJHKLPK), është realizuar në Baimoc (Babin Most) dhe Vushtrri. Mbështetjen operative e kanë ofruar Njësia Speciale e Policisë së Kosovës dhe Njësia Forenzike e Policisë së Kosovës”, bën të ditur EULEX nëpërmjet një komunikate.

Të dyshuarit u arrestuan me urdhër të gjykatës, ndërsa është bërë edhe bastisja e shtëpive. Rasti është duke u hetuar nga Prokuroria Speciale e Kosovës (PSRK).

Sipas avokatit të të arrestuarit Gjorgje Bojkovic, klienti i tij është një pensionist dhe se dyshimet me të cilat ai është arrestuar nuk qëndrojnë.

Avokati nga Veriu i Mitrovicës Miodrag Berklac ka thënë se rreth orës 5 të mëngjesit forca të mëdha të policisë kanë rrethuar shtëpinë e Bojkovicit.

“ Policia e ka arrestuar atë. Në shtëpi mund të shihet rrëmujë e krijuar gjatë bastisjes. Me sa di unë ata kanë konfiskuar një telefon dhe gjësende tjera për të cilat nuk di””, ka thënë Berklac, përderisa kishte shkuar në shtëpinë e të arrestuarit për konsultim me gruan e Bojkovicit.

“ Ai ka punuar në minierën e Kishnicës dhe nga mosha 55 vjeçare gjendet në pension. Ai kurrë nuk ka qenë pjesëmarrës i ndonjë lufte, madje posedon disa dokumente të Sllovenisë që ai nuk ka kryer edhe ushtrinë për shkak se ka qenë i paaftë”, thotë avokati, shkruan Express.
Ai ka thënë se gjatë kohës së luftës klienti i tij kishte jetuar në Prishtinë.

“ Prej përfundimit të luftës ai është kthyer për të jetuar në shtëpinë e tij këtu në Babi Moc. Këtë shtëpi e ka me dhjetëra vite”, rrëfen ai.

Berklac ka thënë se Gjorgje Bojkovic ka jetuar vetëm me gruan e tij, përderisa tri vajzat që ka nga martesa janë të martuara dhe nuk jetojnë në Kosovë.

“ Ai nuk ka asnjë djalë. Jeton pos me gruan e tij”, sqaron ai.

Përderisa ky serb po mbahet në policinë për 48 orë, avokati thotë se do të vizitojë atë dhe pret që gjykata ta liroj atë.

“Jam i bindur se ai do të lirohet për shkak se vepra me të cilën akuzohet nuk qëndron”, tha ai. /Telegrafi/